“Nina Qallu” sutichasqawanmi wawqiy Percy Borda maytu harawikunata sumaqta qispirqachin. Chaypi qillqasqanta ñawinchaykuspaymi sunquy ninawanhinaraq kallpachakuspa kusirikun, imaraykuchus, ichaqa qichwa llaqtanchik kawsayninmanta rimaptin; runa masinchikpa sunqunhina sunqun nanachikuspa qillqasqanwan; paykunapa ñawinpashina, kunkanpashina qawarispa, kallpawan qaparispa qillqasqanwan; ichaqa huk punchaw sumaq kawsay tarinapaq, runa sarunchay usuchiy ima “wañuchinapaq” chinkananpaq; ichaqa Pachamanchik kawsachiwasqanchik ukupi, pay uywakuwasqanchikmanhina. Kusikullanitaqmi wawqinchik Percy waynamanta qillqaq kasqanwan; chayqa qipa wiñaykunapa sutinpichá lliw runa siminchikkuna chaninchay puririnqa, anti suyukunapipas, yunka suyukunapipas.
 
Kay maytuta ñawinchaykuspayá runa sunqunchikta kallpancharisun, allinta kikinchakuspataq ayllunchik allin kawsayman aypananpaq sayapakusun. Chaychá Percypa sunqunpas qillqasqanwan kusisqa kanqa.
 
Oscar Chávez Gonzales
Especialista de formación docente en educación intercultural bilingüe